അങ്ങനെ രണ്ടാം കൊല്ലം സമാഗമമായി,
ഒന്നാം കൊല്ലത്തില്‍ ഞങ്ങള്‍ പഠിച്ചതും നേടിയതും ആയ എല്ലാ മനശാസ്ത്രപരമായ
അറിവുകളും , മറ്റു വിഷയങ്ങളുമായി ബന്ധപ്പെട്ടു നേടിയ അറിവുകളും പയറ്റാന്‍
സമയമായി . , ഇത് വരെ ദീര്‍ഘമായ ക്ലാസുകള്‍ ഒന്നും തന്നെ
കൈകാര്യം ചെയ്തിട്ടില്ല, പുസ്തകങ്ങളിലൂടെ മാത്രം നേടിയ അറിവ് വച്ച്
ക്ലാസ്സുകള്‍ കൈകാര്യം ചെയ്യണം . ഓരോ സ്കൂളിലേക്കും ഓരോ ഗ്രൂപ്പാണ്
പോകുന്നത്,. ഓരോ ഗ്രൂപ്പും കിട്ടിയ സമയത്തിനുള്ളില്‍ ,ഒരുക്കങ്ങള്‍
തുടങ്ങിയിരുന്നു . എത്രയൊക്കെ ഡേറ്റ് തന്നാലും അവസാന നിമിഷത്തില്‍ ആണ്
ഞങ്ങളില്‍ പലരും പാഠ ഭാഗങ്ങളുമായി ബന്ധപ്പെട്ട മോഡ്യൂള്‍ ,പെഡഗോഗി എന്നിവ
തയ്യാറാക്കിയത് . 90 ല്‍ അധികം വരുന്ന കുട്ടികളെ കൃത്യമായി ക്ലാസ്സ്‌
എടുക്കുന്നതിനു തയ്യാറാക്കുന്നതില്‍ മുഖ്യ പങ്ക് വഹിച്ചത് റിയാസ് സര്‍
ആയിരുന്നു . തണുപ്പന്‍ മട്ടില്‍ നീങ്ങുന്നവരെ ചൂടാക്കുന്നതില്‍ സര്‍ മുഖ്യ
പങ്ക് വഹിച്ചിരുന്നു .
ഒടുവില്‍ ആ ദിനം വന്നെത്തി,
ഞാനടക്കം 5 പേര് ഉള്‍പ്പെടുന്ന സംഘം, ചെമ്മാണിയോട് സ്ഥിതി ചെയ്യുന്ന "പി
ടി എം യു പി എസ് ചെമ്മാണിയോട് " എന്ന അതിമനോഹരമായ സ്കൂളില്‍ എത്തി .
അതിവിശാലമായ കളിസ്ഥലം ആണ് ഞങ്ങളെ അവിടെ വരവേറ്റത് . കളിസ്ഥലതിന്റെ ഒരു
വശത്തിലൂടെ ഞങ്ങള്‍ ഓഫീസ് ലകഷ്യമാക്കി നടന്നു . ബെല്‍ അടിച്ചിട്ടില്ല ,
കുട്ടികള്‍ ഗംഭീര കളിയിലാണ് . നടന്നു ഓഫീസിനു അടുത്തെത്താറായി, അവിടെ പരാതി പറയുന്നതിനും മറ്റു
കാര്യങ്ങള്‍ക്കുമായി ഒരുപാട് കുട്ടികള്‍ അധ്യാപകര്‍ക്ക് ചുറ്റും
നില്‍ക്കുന്നുണ്ട് , ഇതെല്ലാം കണ്ടപ്പോള്‍ ഞാനെന്റെ ബാല്യകാല
സ്മരണകളിലേക്ക് പോയി,..........
" തച്ചിങ്ങനാടത്തെ കൃഷ്ണ എ
യു പി സ്കൂള്‍ എന്ന വിദ്യാലയത്തിലാണ് ഈയുള്ളവന്‍ പഠിച്ചത് , കണക്ക്
പഠിപ്പിക്കാന്‍ ചൂരലും പിടിച്ച് നടന്നു വരുന്ന ആന്റണി മാഷെയും തോമസ്‌
മാഷെയും നാണു മാഷെയും എങ്ങനെ മറക്കാനാ ?? ബെല്ലടിച്ചതിന് ശേഷവുമുള്ള
ക്രിക്കറ്റ്‌ കളി , പഠന യാത്രകള്‍ , അമ്മയെപ്പോലെ സ്നേഹിക്കുന്ന
അധ്യാപികമാര്‍ ... "
" കറക്റ്റ് സമയത്താണല്ലോ ? " ഫക്രുദ്ദീന്‍
സാറിന്റെ ചോദ്യം കേട്ടപ്പോഴാണ് സ്ഥലകാല ബോധം വന്നത് , " ആദ്യ ദിനമല്ലേ
മാഷെ ? " ഞാന്‍ ചിരിച്ചു കൊണ്ട് മറുപടി പറഞ്ഞു , ഇദ്ദേഹമാണ്, എനിക്ക്
അനുവദിച്ചു തന്നിരിക്കുന്ന സയന്‍സ് ക്ലാസ്സിന്റെ അദ്ധ്യാപകന്‍ .
മഴയപ്പോള്‍ ചാറാന്‍ തുടങ്ങിയിരുന്നു , ഞങ്ങള്‍ വേഗം ഞങ്ങള്‍ക്കായി
ഒരുക്കിയ പ്രത്യേക സ്റ്റാഫ്‌ റൂമിലേക്ക് പോയി, സാധന സാമഗ്രികള്‍ ഇറക്കി
വച്ചു . പോകുന്നതിനു മുന്നോടിയായി അതാത് വിഷയങ്ങളുടെ സാമഗ്രികള്‍ അധ്യാപകരെ
കാണിച്ച് ഒപ്പ് വാങ്ങിക്കണം , ഞാനെന്റെ മോഡ്യൂളുകളും പെഡഗോഗികളും
ടീച്ചിംഗ് എയ്ട്സും അതാത് അധ്യാപകരെ കാണിച്ച് ഒപ്പ് വാങ്ങി ,പരസ്പരം ആശംസകള്‍ പറഞ്ഞു. കര്‍ശനമായി പാലിക്കേണ്ട നിയമങ്ങള്‍
ഒരിക്കല്‍ കൂടി പരസ്പരം ഓര്‍മിപ്പിച്ചു . മറ്റൊരു സ്ഥാപനം ആണ് , ഒരു
കാരണവശാലും അനുവദിക്കപ്പെട്ട ക്ലാസ്സുകളില്‍ പോകാതിരിക്കരുത് , അങ്ങനെ
വന്നാല്‍ ക്ലാസ് അധ്യാപകനെ അറിയിക്കണം ....എന്നിങ്ങനെ ..
......................
ഓരോ വിഷയത്തിന്റെയും അധ്യാപകരുടെ ക്ലാസ് കണ്ട് മനസ്സിലാക്കിയതിനു ശേഷമേ ഞങ്ങള്‍ ക്ലാസ് എടുക്കാവു , ചിലര്‍ മുന്നോരുക്കങ്ങള്‍ക്കായി സമയം ചോദിക്കും ,ചിലര്‍ ആദ്യമേ എടുത്ത് കാണിച്ചു തരും . ഇന്ന് എനിക്ക് 5-A ലെ ഇംഗ്ലീഷ് ക്ലാസ് കാണാനുള്ള അവസരം ഉണ്ട്. ഞാന്‍ ഇംഗ്ലീഷ് എടുക്കേണ്ടതും ഈ ക്ലാസിലാണ് .
മഴയ്ക്ക് ഒരവസാനം കാണാതായപ്പോള്‍ ഞാന്‍ ഓഫീസില്‍ നിന്നും ക്ലാസ്
ലകഷ്യമാക്കി ഇറങ്ങിയോടി . അപ്പോഴേക്കും സുധര്‍മ്മ ടീച്ചര്‍ ക്ലാസ്സില്‍
എത്തിയിരുന്നു. ഞാന്‍ പതിയെ ക്ലാസ്സിലേക്ക് പ്രവേശിച്ചു ,കുട്ടികളുടെ നിഷ്കളങ്കമായ "ഗുഡ് മോണിംഗ് സാര്‍ " എന്നില്‍
പെട്ടെന്നൊരു ഭയം ഉളവാക്കി . അവരുടെ പുഞ്ചിരിയില്‍ ആ ഭയം മായ്ഞ്ഞു പോകാന്‍
അധികം സമയം വേണ്ടി വന്നില്ല . സുധര്‍മ്മ ടീച്ചറുടെ ക്ലാസ്സ്‌
നിരീക്ഷണത്തിന് ശേഷം, 7-D ല്‍ ഗണിതം ആയിരുന്നു . ഞാന്‍ ക്ലാസ് ലക്‌ഷ്യം
വച്ച് നടന്നു . മഴ മേഘങ്ങള്‍ ഒന്നിന് പിറകെ ഒന്നായി പോകുന്നത് ആകാശത്ത്
നല്ലൊരു കാഴ്ചയായിരുന്നു .
7-D ല്‍ ഖദീജ ടീച്ചറുടെ
ഗണിതമാണ് എനിക്ക് കിട്ടിയത് , വരകളിലെ ഒരുമ എന്ന അദ്ധ്യായം . പാഠത്തിന്റെ
പേര് പോലെ ഒരുമ പാഠ ഭാഗങ്ങള്‍ക്ക് ഇല്ലായിരുന്നു എന്നാണ് ഒറ്റ
നോട്ടത്തില്‍ ആ പാഠം കണ്ടപ്പോള്‍ എനിക്ക് തോന്നിയതെങ്കിലും , എന്റെ അധ്യാപന
ജീവിതത്തില്‍ ഒരിക്കലും മറക്കാനാകാത്ത ഓര്‍മ്മകള്‍ സമ്മാനിച്ച ഒരു അധ്യായം ആയിരുന്നു അത് . 6-C യിലെ സയന്‍സ് ആയിരുന്നു അടുത്ത പിരിയഡ് , ഞാന്‍ അങ്ങോട്ടേക്ക് നടന്നു .
ഈ ക്ലാസ്സിനെ കുറിച്ച് പറയുകയാണെങ്കില്‍ ഒരുപാടുണ്ട് പറയാന്‍.. സ്നേഹിക്കാന്‍ മാത്രം അറിയാവുന്ന ഒരു പറ്റം
കുട്ടികള്‍ .. ഞാന്‍ പറയുന്ന ഓരോ ചെറിയ കാര്യവും മനസ്സില്‍ ഓര്‍ത്തു വച്ച്
സൂക്ഷ്മ വിശകലനം ചെയ്യുന്നതില്‍ ഇവര്‍ മിടുക്കരാണ് . . അതിനാല്‍ തന്നെ
അതീവ ശ്രദ്ധയോടെയായിരുന്നു ഞാന്‍ ഓരോ കാര്യവും പറഞ്ഞിരുന്നത് . ഈ ബ്ലോഗില്‍
,ഇതെഴുതുന്ന സമയത്ത് അവര്‍ യു പി സ്കൂള്‍ ജീവിതത്തോട് വിട പറയാനുള്ള
തയ്യാറെടുപ്പിലായിരിക്കും .
ഇതൊക്കെയാണെന്റെ ക്ലാസ്സുകളെ കുറിച്ചുള്ള വിവരങ്ങള്‍.. ഇനി ഓരോ ദിവസവും നടന്ന സംഭവങ്ങളെ കുറിച്ച് പറയുന്നില്ല... അതൊരു പക്ഷെ മടുപ്പുളവാക്കും
ഉച്ചക്ക് ഞങ്ങള്‍ , ചോറ് വിളമ്പാന്‍ കൂടുമായിരുന്നു , പലര്‍ക്കും
പല തരത്തിലാണ് വിളമ്പേണ്ടത്‌, ചിലര്‍ക്ക് ചോറ് കുറച്ചു മതി ,
ചിലര്‍ക്കാകട്ടെ പയര്‍ അധികം വേണം ,..ചിലര്‍ക്ക് വിളമ്പുന്നതില്‍
സ്ഥാനങ്ങളുണ്ട് .. ആദ്യത്തെ ഒന്ന് രണ്ടു ദിവസങ്ങള്‍ കൊണ്ട് അത്
പഠിച്ചെടുത്തു .. കുട്ടികളോട് ഒരു സൗഹൃദം സ്ഥാപിക്കുന്നതില്‍ ഈ
കണ്ടെത്തല്‍ സഹായിച്ചു .. സ്കൂളിലെ അധ്യാപകരും ഞങ്ങള്‍ക്കൊപ്പം
ഉണ്ടാകുമായിരുന്നു .
ദിവസങ്ങള്‍
പെട്ടെന്ന് കൊഴിഞ്ഞു പോയി. പാഠഭാഗങ്ങള്‍ പതിയെ തീര്‍ന്നു കൊണ്ടിരുന്നു..
കുട്ടികളില്‍ വെല്ലുവിളി ഉയര്‍ത്തുന്ന രീതിയില്‍ സയന്‍സും ഗണിതവും
അവതരിപ്പിക്കുന്നതില്‍ ഞാന്‍ പ്രത്യേക ശ്രദ്ധ ചെലുത്തിയിരുന്നു . അധിക
ദിവസങ്ങളിലും എന്റെ കയ്യില്‍ കുറ്റി ചെടികളും വള്ളി ചെടികളും
ഉണ്ടാകുമായിരുന്നു . ഇത് ലഭിക്കുന്നതിനായി ,വീട്ടിലെത്തിയ ശേഷം
പാടത്തിലൂടെയും പറമ്പിലൂടെയും നടന്നിരുന്നു , കിട്ടാത്തവ
ഇന്റെര്‍നെറ്റിന്റെ സഹായത്തോടെ ചിത്രങ്ങള്‍ ഡൌണ്‍ലോഡ് ചെയ്ത് ലാപ്ടോപ്പില്‍
പ്രദര്‍ശിപ്പിക്കുമായിരുന്നു ..
 |
| എന്റെ വീടിന്റെ ഉമ്മറത്തെ പയര്‍ |
ഇതിനിടയില്‍ മൃദുല ടീച്ചറും റഹ്മത്ത്
ടീച്ചറും റിയാസ് സാറും ഞങ്ങളുടെ ക്ലാസ്സുകള്‍ കാണാന്‍ വന്നിരുന്നു,.. അവസാന സയന്‍സ് ക്ലാസ്സില്‍ (08/07/2011) ഒരു മിശ്രിതം ഉണ്ടാക്കുവാനുള്ള പ്രവര്‍ത്തനമായിരുന്നു , "പുകയില കഷായം " . പത്താമത്തെ സയന്‍സ് ക്ലാസ് , സയന്‍സ് അദ്ധ്യാപകന്‍ എന്ന റോള്‍ ഇന്നിവിടെ അവസാനിക്കും .... പുകയില, ഞാന്‍ കാണാതെ എടുത്ത് വാസനിച്ച 3 പേര്‍ക്ക് തലകറക്കം വന്നു ,.. അവരെ മാറ്റിയിരുത്തി ക്ലാസ്സ്‌ തുടര്‍ന്നു .. കൃത്യ സമയത്ത് തന്നെ ക്ലാസ്സ്‌ അവസാനിപ്പിക്കാന്‍ കഴിഞ്ഞു
ഗണിതത്തിലെ സമാന്തര രേഖകള്‍ എന്ന ആശയത്തെ നിത്യജീവിതവുമായി ബന്ധിപ്പികാന്‍
എനിക്ക് കുറച്ച് വിയര്‍പ്പൊഴുക്കേണ്ടി വന്നു . അവര്‍ക്ക് കണ്ടും കേട്ടും
മാത്രം പരിചയമുള്ള സന്ദര്‍ഭങ്ങള്‍ കണ്ടെത്തുക എന്നത് ശ്രമകരവും അതെ സമയം
ആനന്ദം നല്‍കുന്നതും ആയിരുന്നു . ഇന്റര്‍നെറ്റ്‌ ഇവിടെയും എന്നെ ഒരുപാട്
സഹായിച്ചു
മലയാളവും സാമൂഹ്യ ശാസ്ത്രവും തുടങ്ങാനുള്ള സമയമായി.. മലയാളം 6-C യില്‍ തന്നെയായത് കൊണ്ട് ഒരു മാറ്റമായി തോന്നിയില്ല .. എന്നാല്‍ 6-B യിലെ സാമൂഹ്യ ശാസ്ത്ര ക്ലാസ് ഒരു പുതിയ അനുഭവമായിരുന്നു .. ഇതിനിടയില്‍ ഒരു പി ടി എ യോഗം കാണുന്നതിന് അവസരം ലഭിച്ചു . 6-c യിലെ ഓരോ കുട്ടിയുടെയും രക്ഷകര്താക്കള്‍ എന്നെ അന്വേഷിച്ചു വന്നു... എനിക്കതില്‍ സന്തോഷവും അഭിമാനവും തോന്നി .. ക്ലാസില്‍ നടക്കുന്ന ഓരോ കാര്യവും അവര്‍ വീട്ടില്‍ പറയാറുണ്ടായിരുന്നു .കുട്ടികളെ കുറിച്ച് എനിക്കറിയാവുന്നതെല്ലാം ഞാനവരെ ബോധിപ്പിച്ചു ..
21/07/2011 ന് ചന്ദ്രദിനവുമായി ബന്ധപ്പെട്ട്‌ പ്രവര്‍ത്തനങ്ങള്‍ നടത്തുവാന്‍ തീരുമാനിച്ചു , ഇതിനായി പരിപാടികള്‍ ആസൂത്രണം ചെയ്തു. ക്വിസ്സ് പ്രോഗ്രാം , പ്രദര്‍ശനം , പതിപ്പ് ,ചുമര്‍ പത്രിക എന്നിവയാണ് പരിപാടികള്‍ , ഫക്രുദീന്‍ സാറും മുസ്തഫാ സാറും ഞാനും ചേര്‍ന്ന് ഞങ്ങള്‍ ഇരുന്നിരുന്ന റൂം പ്രദര്‍ശനത്തിനായി തയ്യാറാക്കി ..
21/07/2011 ന് രാവിലെ ഞാന്‍ നേരത്തെ എത്തി , പ്രദര്‍ശന വസ്തുക്കള്‍ ക്രമീകരിച്ചു . ക്ലാസ്സ്‌ തുടങ്ങുന്നതിനു മുന്‍പേ തന്നെ കുട്ടികള്‍ പ്രദര്‍ശനം കാണാന്‍ എത്തി തുടങ്ങിയിരുന്നു . കുട്ടികള്‍ വളരെ കൗതുകത്തോടെ ചിത്രങ്ങള്‍ വീക്ഷിച്ചു , ചിലര്‍ നോട്ടുബുക്കില്‍ ആവശ്യമായവ എഴുതിയെടുക്കുന്നുണ്ടായിരുന്നു . പതിപ്പിന് ആവശ്യമായ കാര്യങ്ങള്‍ കുട്ടികള്‍ രാവിലെ മുതല്‍ക്കേ കൊണ്ട് വന്നു തന്നിരുന്നു . പ്രതീക്ഷിക്കാതെയായിരുന്നു വഫിഖ ടീച്ചറും ഹസ്നത്ത് ടീച്ചറും വന്നത് . ചാന്ദ്രദിനത്തില്‍ സ്കൂളില്‍ സംഘടിപ്പിച്ച പരിപാടികള്‍ അവര്‍ ഓരോന്നായി വീക്ഷിച്ചു . പിന്നീട് ഞങ്ങളുടെ ഏതാനും ചില ക്ലാസ്സുകളും വീക്ഷിച്ചു . ഇന്ന് ചോറിനു , സാമ്പാര്‍ ആയിരുന്നു . വഫിഖ ടീച്ചറും ഹസ്നത്ത് ടീച്ചറും ഞങ്ങളും ഒരുമിച്ചിരുന്നാണ് ഭക്ഷണം കഴിച്ചത് .
ദിവസങ്ങള്‍ കടന്നു പോയി ,ഒരു ദിവസം 3 പീരീഡ്‌ മാത്രമായി ചുരുങ്ങി . എങ്കിലും എനിക്ക് 7 പീരീഡും ക്ലാസ്സ്‌ എടുക്കാന്‍ താല്പര്യമുള്ള ക്ലാസ് ആണ് 6-C, അവിടെ സയന്‍സും മലയാളവും എടുക്കുന്നത് ഞാന്‍ ആണ് .എനിക്ക് മാത്രമല്ല എന്റെ കൂടെ ഉള്ളവര്‍ക്കും ആ ക്ലാസ്സിനെ വളരെയധികം ഇഷ്ട്ടമാണ് . ശിഖ , അര്‍ച്ചന ,ഐശ്വര്യമാര്‍ , ദേവിക ,ഗോപിക ,വിബീഷ് ,ലെനിന്‍ ,വിഷ്ണു ,സുധീഷ്‌ , ശ്രേയ ,അശ്വതി ,ചിത്രം വരയ്ക്കുന്ന മിഥുനും കിരണും ..... ഇവരോയൊക്കെ ഒരിക്കലും മറക്കുവാന്‍ സാധിക്കില്ല .ലിസ്റ്റ് പൂര്‍ണമല്ല ഇനിയുമുണ്ട് , ഇന്നവിടെ (22/07/2011) കാരണം കണ്ടെത്തുന്ന ഒരു പ്രവര്‍ത്തനമാണ് , അത് തുടങ്ങാന്‍ അവരെന്നെ അനുവദിച്ചിട്ടില്ല കാരണം തലേ ദിവസം എഴുതിയ കത്ത് , ഇനിയും വായിച്ചവര്‍ക്ക് വായിച്ചേ പറ്റു ഒരു തവണ വായിച്ചവര്‍ക്ക് പുതുതായി എഴുതിയ കത്ത് വായിക്കണം . ഞാന്‍ ധര്‍മ സങ്കടത്തില്‍ ആയി .. അവസാനം ഒരു ഈര്‍ക്കില്‍ കയ്യിലെടുക്കേണ്ടി വന്നു അവരെ ഒന്ന് ഇരുത്താന്‍ . ഇതിനിടെ ദേവിക ഞാന്‍ എടുക്കുന്ന ഈര്ക്കിലുകളുടെ കണെക്കെടുക്കുന്നുണ്ടായിരുന്നു . (ദിനവും ഞാന്‍ ഓരോ ഈര്‍ക്കില്‍ എടുക്കുമെങ്കിലും അതിന്റെ ആവശ്യം വരാറില്ലായിരുന്നു .) ദേവിക എണ്ണുന്ന കാര്യം ഞാനപ്പോഴാണ് ശ്രദ്ധിച്ചത് . അവരുടെ ക്ലാസ്സിലെ ഈര്‍ക്കില്‍ ചൂല്‍ ഞാന്‍ വരുമ്പോഴുള്ളതിനേക്കാള്‍ ശോഷിച്ചിരിക്കുന്നു . .. ..
അങ്ങനെ അവസാന 3 നാളുകളിലേക്ക് എത്തി , പഠനത്തിനു ശേഷമുള്ള വിലയിരുത്തലുകളുടെ തിരക്കിലാണ് .. എല്ലാ ക്ലാസുകളിലും പരീക്ഷ നടത്തി . അതിനിടയിലാണ് മുബീന എന്നാ 6-B യിലെ കുട്ടി ഒരു കത്ത് കൊണ്ട് വന്നു തന്നത് . അതില്‍ എനിക്കുള്ള ആശംസകളും ക്ലാസ്സിനെ കുറിച്ചുള്ള അഭിപ്രായങ്ങളും ആയിരുന്നു .
പരീക്ഷ കഴിഞ്ഞ് എല്ലാ ക്ലാസ്സുകളിലും മൂല്യ നിര്‍ണയം കഴിഞ്ഞ ഉത്തര പേപ്പറുകള്‍ മടക്കി നല്‍കി , ഓരോ ക്ലാസ്സില്‍ നിന്നും 5-6 പേപ്പറുകള്‍ തിരികെ വാങ്ങി , ഫയലില്‍ സൂക്ഷിച്ചു .പല കുട്ടികളുടേയും മുഖത്ത് ഭാവ മാറ്റങ്ങള്‍ കണ്ടു തുടങ്ങിയിരുന്നു. നോമ്പിന്‍ കാലം ആയിരുന്നതിനാല്‍ ഉച്ച വരെ മാത്രമേ ക്ലാസ്സ്‌ ഉണ്ടായിരുന്നുള്ളൂ . ക്ലാസ് വിട്ടതിനു ശേഷവും കുട്ടികള്‍ ഞങ്ങള്‍ക്ക് ചുറ്റും നിന്നു . നാളെയും വരണമെന്ന് പറഞ്ഞു, ചിലര്‍ ഷെയ്ഖ് ഹാന്‍ഡ്‌ തന്നു . അങ്ങനെ ഒരു വിധം യാത്ര പറച്ചിലുകള്‍ക്ക് ശേഷം ഞങ്ങള്‍ HM നെയും മറ്റു അധ്യാപകരെയും കണ്ട് യാത്ര പറഞ്ഞു , അഭിപ്രായങ്ങള്‍ ആരാഞ്ഞു . അറ്റന്റന്‍സ് രെജിസ്ടര്‍ , ഞങ്ങളെ വിലയിരുത്തിയ രേഖകള്‍ എന്നിവ കൈപ്പറ്റി . പതിയെ ഗ്രൌണ്ടിന്റെ ഒരു സൈഡിലൂടെ റോഡ്‌ ലകഷ്യമാക്കി നടന്നു ,... മഴ ചെറുതായി ചാറുന്നുണ്ടായിരുന്നു .. സ്കൂള്‍ ബസ്‌ വരാന്‍ വൈകുമെന്നതിനാല്‍ അടുത്ത ട്രിപ്പിനുള്ള കുട്ടികള്‍ പല കളികളില്‍ എര്പെട്ടിരിക്കുകയാണ് . ആകാശത്ത് മഴ മേഘങ്ങള്‍ കൂട്ടം കൂടി നില്‍ക്കുന്നുണ്ട് .. വലിയ മഴ വരുന്നുണ്ട് , അങ്ങ് ദൂരെ നിന്നും ബസ്സിന്റെ ഹോണ്‍ കേള്‍ക്കുന്നുണ്ട് ., ഞങ്ങള്‍ ബസ്‌ സ്റ്റോപ്പ്‌ ലക്ഷ്യമാക്കി ഓടി ,. ഈ സ്കൂളിനെയും കുട്ടികളെയും ഇവിടുത്തെ ഓര്‍മകളെയും പിന്നിലാക്കി കൊണ്ട് .. .........
